Forseti Úkraínu segir Úkraínumenn standa eina í vörnum landsins

Talið er fullvíst að Rússar standi að baki töluárásinni sem lamaði allt tölvukerfi stjórnvalda, stjórnsýslu og banka í Úkraínu fyrr í dag.

Vladimir Putin er nú ekkert að vanbúnaði til allsherjar innrásar í Úkraínu eftir að efri deild rússneska þingsins staðfesti í dag frumvarp neðri deildar frá í gær sem veita forsetanum heimild til að beita rússneska hernum utan landamæranna.

Öryggis- og varnamálaráð Úkraínu leggur til við þing landsins að neyðarlög verði sett til að svara aðgerðum Putins. Þær myndu ná til allra hérða nema Donetsk og Luhans og gætu þýtt takmarkanir á ferðum og flutningum, að eftirlitsstöðvar verði settar upp og athugarnir á skilríkjum fólks. Atkvæðagreiðslu um tillöguna var hins vegar frestað eftir tölvuárásina í dag.

Andrzeij Duda forseti Póllands og Gitanas Nauseda forseti Litháen, forsetar tveggja NATO ríkja í austur Evrópu, komu til Kænugarðs í dag til skrafs og ráðagerða með Volodymyr Zelenskyy forseta Úkraínu. Saga þeirra er samofin því Litháen var hernumin af Sovétríkjunum í um hálfa öld fram að hruni þeirra en Pólverjar voru áður undir einiræðisstjórn kommúnista og í Varsjárbandalaginu með Sovétríkjunum.

Að fundi þeirra loknum sagði Zelenskyy Úkraínumenn ekki fara í grafgötur með að þeir tilheyrðu engu varnarsamstarfi og þeir þyrftu að verja sig sjálfir.

„Þess vegna þarf Úkraína á skýrum og nákvæmum öryggistryggingum að halda án tafar. Við viljum vera viss um að geta varið fólkið okkar og húsin okkar,“ sagði forsetinn.

Hvetur til harðari aðgerða gegn Rússum

Mörg NATO ríki og þar með talin austur evrópu ríki hafa sent Úkraínumönnum vistir og hergögn að undanförnu. Artis Pabriks utanríkisráðherra Lettlands er sannfærður um að land hans væri í sömu stöðu og Úkraína ef Lettland væri ekki í NATO og Evrópusambandinu. Hann vill harðari aðgerðir gegn Rússum en þegar hafa verið samþykktar.

„Engar refsiaðgerðir eru nógu harðar til að fæla Rússa. Þær ættu til dæmis að ná til flugfélaga þeirra vegna þess að 80 prósent flugflota þeirra er smíðaður á Vesturlöndum,“ segir Pabriks

Pútin vinni nú eftir sovéskri forskrift við innlimun Úkraínu. Rússneskir ráðamenn og oligarkar tali stöðugt um úrkynjun Vesturlanda.

„En þeir búa á Vesturlöndum, þeir ganga í vestræna skóla, þeir fara á skíði í vestrænum ríkjum og geyma fjármuni sína á Vesturlöndum. Ef þér líkar ekki við vestrið og telur það hafa á röngu að standa, farðu þá á skíði í Úralfjöllum,“ segir utanríkisráðherra Lettlands.

Auðvitað muni refsiaðgerðir bitna á óbreyttum borgurum í Rússlandi. Spurningin væri hins vegar hversu lengi rússneskur almenningur ætti að þjást undir núverandi forystu landsins. Ef Rússi ætlaði sér út á götu að mótmæla Putin myndi hann einfaldlega enda í fangelsi.

Pabriks segir hugsanlegt að Putin sé að verða ofsóknaóðari en áður því í Rússlandi fari leiðtogaskipti aðeins fram með tvenns konar hætti.

„Með valdaráni eða byltingu. Ekkert varir að eilífu og ég held að hann geri sér grein fyrir því. Það er mitt persónulega mat að ef hann leggur út í stórstyrjöld gegn Úkraínu gæti það endað með stjórnarskiptum í Rússlandi,“ segir Pabriks.

Boris Johnson forsætisráðherra Bretlands sagði í fyrirspurnatíma á þingi í dag að Bretar hefðu nú þegar gripið til refsiaðgerða gegn hátt í 300 rússneskum einstaklingum og öflugum rússneskum bönkum. Mikilvægt væri að Bretar stæðu síðan með öðrum vestrænum ríkjum í frekari aðgerðum gegn Putin.

„Að við þrengjum sameiginlega að honum. Að við þrengjum samtímis að honum í Lundúnum, París og New York. Samheldnin skiptir öllu máli,“ sagði Johnson.