Um­boðs­maður Haalands segir Real Madrid vera draum hvers leik­manns

Hinn 22 ára gamli Haaland hefur vægast sagt farið vel af stað síðan hann gekk í raðir Manchester City frá Borussia Dortmund og hefur hann skorað 27 deildarmörk fyrir liðið í aðeins 24 leikjum.

Þrátt fyrir að vera nýlega genginn í raðir Englandsmeistaranna eru margir strax farnir að velta fyrir sér hvaða skref hann tekur næst á ferlinum og Pep Guardiola, knattspyrnustjóri liðsins, hefur áður þurft að neita fyrir sögusagnir þess efnis að leikmaðurinn sé með klásúlu í samningi sínum sem geri honum kleift að ganga í raði Madrídinga næsta sumar.

„Þú ert með ensku úrvalsdeildina og svo ertu með Real Madrid,“ sagði umboðsmaður Norðmannsins í vikunni.

„Þeir eru með eitthvað einstakt sem gerir það að verkum að þeir eru draumur hvers leikmanns. Madrid heldur töfrunum á lífi. Þeir eru kannski ekki í hörkuleikjum í hverri viku, en þeir eru með Meistaradeildina,“ bætti Pimenta við, en Real Madrid er langsigursælasta lið í sögu Meistaradeildarinnar.

Madrídingar hafa unnið Meistaradeild Evrópu alls fjórtán sinnum, þar af fimm sinnum síðan liðið sló Englandsmeistara Manchester City úr leik í undanúrslitum árið 2014. Haaland og félagar hans í City eiga hins vegar enn eftir að vinna keppnina.