Flúði kuldann heima og gisti í Kópa­vogi

„Það er búið að vera ansi kalt og auðvitað er kuldinn hjá okkur ekkert miðað við það sem Grindvíkingar þurfa að upplifa en þetta er svona samfélagslegur viðburður í augnablikinu. Það var skítakuldi heima,“ segir Ásmundur og það hafi endað með því að hann og konan fóru og gistu hjá dóttur sinni í nótt.

Ásmundur ræddi málið í Bítinu í morgun. Hann sagði þau hjónin hafa sparað rafmagnið eins og þau gátu og sem dæmi ekki getað hlaðið bílinn heima.

„Þetta er mjög takmarkandi,“ sagði hann og að þau hafi haft miklar áhyggjur af mögulegum skemmdum. Hann hafi rætt við pípara sem hafi sagt þeim að margir væru erlendis og að þeir höfðu áhyggjur af þeim heimilum þar sem enginn er við og nefndi sem dæmi bílaplön sem eru hituð.

Hann sagði píparana ótrúlega fljóta að vinna en að húsin séu mörg. Hann hrósaði öllum viðbragðsaðilum sem starfa við það að koma hitanum á.

Ásmundur sagði að þau ætluðu líklega að gista eina nótt í viðbót. Það hafi í raun ekki verið óbærilegt heima hjá þeim en tók það skýrt fram að þau væru bara tvö hjónin, öll börnin væru uppkomin og flutt að heiman. Staðan væri allt önnur fyrir fólk með ung börn.

„Það er mjög víða ansi strembið.“

Gott að vera vitur eftirá

Spurður um stöðuna hvað varðar orkuflutninga á Suðurnesin sagði Ásmundur að það væri afskaplega gott að vera vitur eftirá en eins og fram hefur komið er flutningskerfið ekki hannað til húshitunar. Ásmundur sagði að það væri almennt þannig í stjórnsýslunni að fólk þyrfti að vera tilbúnara.

„Við þurfum að eiga tæki, við þurfum að eiga efni og víra í leiðslur og við megum ekki standa frammi fyrir því í svona hörmungum að það eru kannski aðföngin sem það strandar á,“ sagði hann og að það væri nauðsynlegt að framkvæma áhættumar og skrá niður hvað þurfi að vera til í landinu til að sinna lágmarksviðbúnaði.

Þau ræddu einnig stöðuna í Grindavík og Ásmundur sagði að það mætti ekki gleyma því að það þyrfti oft að taka áhættu til að bjarga atvinnulífi eða öðru.

Spurður um umræðu fyrr í dag í Bítinu um það að tryggja fólki að fullu hús sín og innbú en ekki bara hluta eins og er lagt til í nýju frumvarpi frá stjórnvöldum sagði Ásmundur að það þyrfti að fara vel yfir málið. Hann vildi ekki taka undir hugmyndir Heimis um að tryggja þeim sitt í samræmi við markaðsverk í stað brunabótamats. Hann benti á að sums staðar á landinu sé brunabótamat hærra en markaðsvirði þeirra.

Hægt er að hlusta á viðtalið hér að ofan í heild.