Samkvæmt umfjöllun New York Times setti Clooney, sem hefur verið ötull stuðningsmaður forsetaefna Demókrataflokksins, sig í samband við Steve Ricchetti en sá var lykilmaður í fjáröflun fyrir forsetaframboð Biden fyrir forsetakosningarnar árið 2020.
Clooney er sagður hafa haft samband gegnum textaskilaboð og gert athugasemdir við þá ákvörðun stjórnvalda að gagnrýna Alþjóðaglæpadómstólinn, eftir að yfirsaksóknarinn Karim Khan ákvað að óska eftir því að dómurinn gæfi út handtökuskipun á hendur leiðtogum Hamas og Ísraelsstjórnar.
Heimildarmenn New York Times segja skilaboðin frá Clooney ekki hafa haft nein áhrif á stefnu Bandaríkjastjórnar en það vekur athygli að eiginkona leikarans, mannréttindalögfræðingurinn Amal Clooney, sat í ráðgjafanefnd sem kom að rannsókn saksóknaraembættisins.
Talsmaður Clooney neitaði að tjá sig um málið þegar eftir því var leitað en sagði leikarann enn ákveðinn í því að verða viðstaddur fjáröflunarviðburð fyrir Biden þann 15. júní næstkomandi, þar sem Barack Obama verður einnig meðal gesta.
