Pakkaflóðið of stórt fyrir flug­vélar er­lendis frá

Þetta segir Hrólfur Andri Tómasson, framkvæmdastjóri Dropp, í samtali við Reykjavík síðdegis um áhyggjur fólks sem bíður eftir pökkum og vörum sem það hefur pantað erlendis frá fyrir jólin. Þó nokkrir neytendur séu orðnir stressaðir. Hrólfur ítrekar að fólk þurfi ekki að hafa of miklar áhyggjur þrátt fyrir biðina og bendir á að það fari alltaf skip frá Danmörku á föstudögum sem skilar sér í höfn í Þorlákshöfn á mánudögum.

„Það kom skip í gær, með helling af pökkum sem að berast núna í þessari viku,“ segir hann og bætir við að miðað við stöðuna eins og hún er núna telji hann að fólk fái pakkana sína fyrir jól.

Bólar enn ekkert á jólagjöf barnabarnsins

Ef miða má við umræðuna á samfélagsmiðlum og þá sér í lagi í hópum á Facebook eru þó nokkrir áhyggjufullir yfir því hvort að vörur sem þeir hafa pantað erlendis frá muni skila sín til landsins í tæka tíð áður en jólin ganga í garð. 

Einn neytandi segir frá raunum sínum á hópnum Markaðsnördar á Facebook. Hann hafði pantað gjöf fyrir barnabarn sitt þann 5. desember á afslætti. Vörurnar sem hann pantaði áttu að berast innan tveggja til þriggja virkra daga en í dag, tólf dögum síðar, bólar enn ekkert á þeim. 

Maðurinn hafi sent kvörtun á bæði Boozt og Dropp og fengið þau svör að vegna fjölda pantana hafi stór hluti verið sendur með skipaflutningi í stað þess að vera sendur með flugvél. Vegna þessa taki sendingarnar lengri tíma en vanalega. Ekki var hægt að gefa nákvæman tímaramma um hvenær sendingin muni berast.

Neytandi þessi tekur fram í færslunni að ekki sé við  Dropp að sakast þar sem fyrirtækið komi ekki að innflutningi. Dropp taki við sendingum þegar þær eru komnar til landsins og dreifi þeim um landið.

Tvöfalda starfsmannafjölda í nóvember og desember

Hrólfur ítrekar að ástæða seinkunar á vörusendingum sé ekki vegna tafa hér á landi.

„Netverslun eykst gífurlega í nóvember og desember, þannig að aðfangakeðjurnar eru bara ekki gerðar fyrir að fá allt í einu tuttugufalt magn á einum degi. Þannig að afhendingartími sem fólk er búið að venjast, kannski tveir til þrír dagar, sem er góð þjónusta gengur engan veginn upp þegar að allir fara á sama kvöldi og panta sér jólagjafirnar,“ segir hann og vísar í tilboðsdaga líkt og dag einhleypa, svartan föstudag og stafrænan mánudag.

Allt árið sé Dropp að undirbúa fyrir nóvember og desember sem séu lang stærstu mánuðirnir. Fyrirtækið tvöfaldi starfsmannafjölda og bílaflotan fyrir þessa mánuði.

Hver er tíminn sem að þið lofið?

„Venjulega er það sem við fáum til okkar fyrir klukkan tvö á daginn tilbúið fyrir klukkan fimm á höfuðborgarsvæðinu þannig að fólk geti sótt það á leið heim úr vinnu. 80 prósent sækir á milli fimm og sjö. Flestir eru að sækja á leiðinni heim.“