Ís­land fyrst Norður­landa með EMotor­ad raf­magns­hjól

„Ég held að það skipti öllu máli fyrir lítil markaðssvæði eins og Ísland að eiga í góðum og beinum samskiptum við þá sem búa til vöruna. Það er erfitt fyrir íslenska endursöluaðila að vera ofarlega í forgangi þegar þeir versla við stór og mikil vörumerki, þetta er ókosturinn við að vera með lítinn markað. Ég held að styrkleiki okkar felist að mörgu leyti í hvað við eigum persónulegt samband við stofnendur EMotorad og það gerir okkur kleift að aðlaga hjólin sérstaklega að íslenskum neytendum,“ segir Bergur Sverrisson, framkvæmdastjóri BSON á Akureyri.

Þétt tengsl við nýsköpunarhugsun í hjólabransanum

EMotorad var stofnað á Indlandi í miðjum heimsfaraldri af fjórum vinum með brennandi áhuga á vistvænum samgöngum, heilsusamlegum lífsstíl og tækninýjungum. Tengsl Bergs við þessa frumkvöðla eiga rætur að rekja til námsára hans í Barcelona en Bergur lauk BA og MBA í námi í viðskiptum frá EU Business School haustið 2023.

Höfuðstöðvar EMotorad fyrir Evrópumarkað eru í Barcelona og þar kynnist Bergur indverskum bræðrum sem sjá um rekstur félagsins í Evrópu. Þessi tengsl leiddu til þess að Ísland varð fyrsta skref EMotorad inn á Norðurlandamarkað. „Þeir eru miklir Íslandsvinir og eru heillaðir af náttúru landsins – og þeir skilja mikilvægi þess að bjóða upp á gæði sem standast kröfur Íslendinga.

Þetta er búið að vera ótrúlega spennandi verkefni og magnað á sjá hvað þeim hefur tekist að vaxa á skömmum tíma. Við heimsóttum höfuðstöðvar EMotorad í Pune á Indlandi í desember 2023. Þá voru höfuðstöðvarnar í lágstemmdu 1500 fm húsi. Það var gaman að sjá hvað starfsfólkið var þéttur hópur og það var mikil sprotafyrirtækisstemning. Mikil hugmyndavinna og almennt góður andi. Ári seinna, eða núna í ársbyrjun 2025, þá eru höfuðstöðvarnar komnar í glænýtt 10.000 fm húsnæði með öllum þeim tækjum og tólum sem þarf til þess að framleiða vörur í hæsta gæðaflokki.”

Hjólin sérstaklega hönnuð fyrir íslenska neytendur

Til þess að mynda sér sérstöðu á íslenskum markaði var tekin ákvörðun um að hanna þrjú hjól sérstaklega með íslenska neytendur í huga. „Við fengum tækifæri til þess að raða saman þremur hjólum og velja íhluti og liti með íslenska neytendur í huga. Ég hef hjólað mikið allt mitt líf. Ég ólst upp í Grafarvoginum og hjólaði mikið á fjallahjólum þar í kring og í Öskjuhlíðinni. Svo fluttum við til Akureyrar og ég hélt áfram að hjóla mikið í nærumhverfinu hér. Ég er líka búinn að kynnast því að búa í stórborg og hjóla til og frá skóla alla daga. Við byggðum á þessari reynslu og völdum íhlutina í þessi þrjú hjól fyrst og fremst með ætlað notagildi í huga. Ég upplifi að það sé allt of algengt að fólk kaupi sér vörur sem henta ekki endilega ætlaðri notkun. Okkur langar að gera þennan fararskjóta aðgengilegan fyrir alla og við viljum að fólkið okkar finni að það fái mikið fyrir peninginn sinn.“

Úr þessu samstarfi fæddust þrjú hjól:

• Tindur – Vel útbúið fulldempað rafmagns fjallahjól ætlað þeim sem vilja geta hjólað í brautum og á krefjandi slóðum.
• Dalur – Fulldempað rafmagns fjallahjól hannað fyrir þá sem vilja hjóla á stígum og slóðum sem og á bundnu slitlagi. Frábært alhliða hjól með mikla drægni og áherslu á notagildi.
• Dögun – Stílhreint, áreiðanlegt og þægilegt borgarhjól með mikilli drægni og klassískri hönnun fyrir daglegar samgöngur.

Græn framtíð – hagkvæmur kostur í umhverfisvænum samgöngum

Rafmagnshjól eru í mikilli sókn og hafa sannað gildi sitt sem vistvænn, hagkvæmur og þægilegur ferðamáti. „Mér finnst gaman að sjá hvað við erum oft harðgerð hér á landi. Ég sé fólk á rafmagnshjólum allan ársins hring hérna á Akureyri. Fólk setur bara nagladekk undir og klæðir sig vel. Með aukinni áherslu á grænar samgöngur verða rafmagnshjól sífellt mikilvægari þáttur í framtíðarsýn Íslands,“ segir Bergur.

EMotorad hjólin eru fáanleg í verslunum BSON á Akureyri og BSport í Reykjavík.

Nánari upplýsingar má finna á vef BSON eða í verslun.