Þúsundir syrgja í Tehran og Trump segir æðstaklerkinn ljúga

Jarðarförin fer fram í Tehran í dag og má þar sjá líkkistur þaktar íranska fánanum og stórar myndir af látnum herforingjum. Þúsundir svartklæddra syrgjenda hafa safnast saman í Enghelab-torgi í miðborg höfuðborgarinnar til að fylgja hinum látnu til grafar.

Meðal þeirra sem verða bornir til grafar eru Mohammad Bagheri, sem var yfirmaður herforingjaráðs Íranska hersins; Hossein Salami, sem var yfirmaður íranska byltingarvarðarins og kjarnorkuvísindamaðurinn Mohammad Mehdi Tehranchi, sem var rektor Azad-háskóla í Tehran.

Íranski æðstiklerkurinn Ali Khamenei fagnaði sigri Írans á Ísraelum í fyrradag og sagði Íran hafa greitt Bandaríkjunum „þungt högg í andlitið“. Í gær var svo greint frá því að hreinsanir væru hafnar í Íran, fjöldi manns hefði verið handtekinn og margir teknir af lífi vegna meintra tengsla við ísraelsku leyniþjónustuna.

Hafi bjargað æðstaklerknum frá „ljótum og smánarlegum“ dauða

Donald Trump Bandaríkjaforseti brást ókvæða við yfirlýsingum æðstaklerksins í gær, sagðist hafa bjargað lífi æðstaklerksins og að Bandaríkin myndu ekki hika við að varpa sprengjum á Íran ef þess þyrfti.

„Af hverju myndi hinn svokallaði „Æðsti leiðtogi,“ Ayataollah Ali Khameini, frá hinu stríðshrjáða Íran, segja svona blygðunarlaust og kjánalega að hann hafi unnið stríðið við Ísrael þegar hann veit að yfirlýsing sín er lygi, það er ekki svo. Sem mjög trúaður maður á hann ekki að ljúga,“ sagði Trump í færslu á samfélagsmiðli sínum, Truth Social.

„Landið hans var gjöreyðilagt, hans þrjár illu kjarnorkustöðvar voru þurrkaðar út og ég veit nákvæmlega hvar hann faldi sig og kom í veg fyrir að Ísrael eða bandaríski herinn, sá langbesti og öflugasti í heiminum, myndu taka líf hans. Ég bjargaði honum frá mjög ljótum og smánarlegum dauða og hann þarf ekki að segja, ,Þakka þér, forseti Trump',“ sagði hann einnig í færslunni.

Þá sagðist hann einnig hafa komið í veg fyrir stórfellda árás Ísraela sem hefði hugsanlega verið lokahöggið. Hann hafi unnið að því að afnema refsiaðgerðir í garð Írans en fái að þökk ummæli æðstaklerksins sem einkennist af reiði og hatri.

Á blaðamannafundi í gærkvöldi sagði Trump síðan að hann myndi „algjörlega“ íhuga að varpa sprengjum á Íran ef það lægi fyrir að Íranir væru að auðga úran.

Utanríkisráðherra Írans, Abbas Araghchi, varaði Trump við því að viðhafa „ruddaleg“ ummæli um æðstaklerkinn sem segir loftárásir bæði Bandaríkjanna og Ísrael hafa haft lítil áhrif.

„Ef Trump forseti er einlægur í að vilja semja ætti hann að hætta þessum ruddalega og óásættanlega tóni í garð æðsta leiðtoga Írans, Ayatollah Khamenei,“ skrifaði Araghchi á samfélagsmiðilinn X.

„Hin mikla og öfluga íranska þjóð, sem sýndi heiminum að stjórn Ísraels gat ekki annað en hlaupið til ,pabba' til að verða ekki flött út af eldflaugum okkur, tekur ekki vel í ógnanir og móðganir,“ sagði Araghchi einnig í færslunni.

Hann gekkst hins vegar við því að kjarnorkumannvirki Írana hefðu orðið fyrir töluverðum skaða í loftárásunum.