Sjálfs­mark í blá­lokin bjargaði Börsungum

Spánarmeistarar Barcelona sóttu nýliða Levante heim í kvöld en meistararnir þurftu að hafa töluvert fyrir sigrinum.

Levante komst í 2-0 í fyrri hálfleik þrátt fyrir að komast varla í sókn. Gestirnir frá Barcelona voru mun sterkari aðilinn í leiknum en tókst einfaldlega ekki að skora í fyrri hálfleik þrátt fyrir ítrekaðar tilraunir.

Pedri braut svo ísinn á 49. mínútu eftir undirbúning frá Yamal og strax þremur mínútum seinna jafnaði Ferran Torres metin.

Tölfræðin úr þessum leik er með ólíkindum en Barcelona var 82 prósent með boltann og átti 26 marktilraunir. Það þurfti svo klauflegt sjálfsmark til í lokin til að tryggja gestunum stigin þrjú þegar Unai Elguezabal skallaði boltann í eigið net eftir fyrirgjöf frá Yamal.

Þrátt fyrir að sigurinn hafi staðið tæpt og fæðingin verið löng og erfið má kannski segja að þetta hafi allt verið eftir áætlun en þetta var fjórði deildarleikurinn í röð sem Börsungar vinna eftir að hafa lent tveimur mörkum undir.