„Við þurfum ekki hjálp frá neinum!“

Í nýrri færslu sem hann skrifaði á Truth Social, sinn eigin samfélagsmiðil, segir Trump að þó bandamenn Bandaríkjamanna, sem hann setur gæsalappir utan um til marks um að hann telji þá lélega bandamenn, vilji ekki koma þeim til aðstoðar séu allir sammála um að árásirnar á Íran séu nauðsynlegar. Klerkastjórnin þar megi alls ekki koma upp kjarnorkuvopnum.

Bandaríkjamenn sögðu bandamönnum sínum ekki frá ætlunum sínum varðandi Íran.

Trump hafði áður gefið til kynna að framtíð NATO væri í húfi ef bandamenn Bandaríkjanna kæmu ekki til aðstoðar við að halda Hormússundi opnu en um fimmtungur allrar olíu heims fer þar um. Átökin í Mið-Austurlandi hafa komið verulega niður á flutningum um sundið og leitt til hækkandi olíuverðs.

„Við erum alltaf til staðar fyrir NATO. Við erum að hjálpa þeim með Úkraínu, þó það sé haf á milli okkar. Það hefur ekki áhrif á okkur en við höfum hjálpað þeim. Það verður áhugavert að sjá hvaða land hjálpar okkur ekki með þetta mjög smáa verkefni, sem er að halda sundinu opnu,“ sagði Trump í fyrrakvöld.

Þá sagðist hann í rauninni vera að krefjast þess að þessi lönd kæmu og verðu þeirra eigin svæði.

Emmanuel Macron, forseti Frakklands, sagði í dag að Frakkar myndu ekki taka þátt í að opna Hormússund. Þeir væru þó að undirbúa það að fylgja olíuflutningaskipum gegnum sundið seinna meir, þegar stríðinu lýkur.

Leiðtogar annarra ríkja í Evrópu og í Asíu, sem Trump hefur þrýst á, hafa slegið á svipaða strengi.

Samskipti Trumps við ráðamenn í Evrópu og víðar hafa farið hratt versnandi á seinna kjörtímabili hans. Fyrir því eru ýmsar ástæður og má meðal annars nefna árásir hans í garð Grænlands, beitingar hans á tollum og persónulega gagnrýni hans í garð þjóðarleiðtoga.

Segir bandamennina ekkert gera fyrir Bandaríkin

Í áðurnefndri færslu á Truth Social segir Trump að það komi sér ekki á óvart að Bandaríkjamenn fái ekki aðstoð. Hann hafi lengi talið NATO vera einstefnugötu þar sem Bandaríkjamenn verji fúlgum fjár í að verja aðra sem vilji ekkert gera fyrir Bandaríkin. Sérstaklega þegar Bandaríkjamenn þurfi á aðstoð að halda.

Trump segir einnig að sem betur fer séu Bandaríkjamenn búnir að svo gott sem gera út af við herafla Íran og leiðtoga ríkisins.

„Vegna þeirrar staðreyndar að við höfum náð svo miklum hernaðarlegum árangri, „þurfum við“ ekki lengur eða viljum aðstoð frá ríkjum NATO. VIÐ ÞURFTUM ALDREI Á HENNI AÐ HALDA!“

Hann segir það sama gilda um Japan, Ástralíu og Suður-Kóreu.

„Reyndar, talandi sem forseti Bandaríkjanna, öflugasta ríkis heimsins, VIÐ ÞURFUM EKKI HJÁLP FRÁ NEINUM!“

Trump var spurður út í færsluna á blaðamannafundi í dag.

Lindsey Graham, öldungadeildarþingmaður og náinn bandamaður Trumps, segist hafa rætt við forsetann um bandamenn Bandaríkjanna í Evrópu. Hann segist aldrei hafa heyrt Trump svo reiðan áður.

„Ég deili þeirri reiði, með tilliti til þess sem er í húfi,“ segir Graham.

Hann segir þessa bandamenn sýna hroka með því að gefa til kynna að klerkastjórn með kjarnorkuvopn sé ekki áhyggjuefni og að ákvarðanir ráðamanna í Evrópu muni reynast áhrifamiklar hvað varðar samband Evrópu og Bandaríkjanna.

Þá segir Graham að með hliðsjón af stöðunni veki það upp spurningar hjá honum varðandi gildi þessara bandalaga.

Fóru í tvenn löng stríð með Bandaríkjunum

Trump hefur áður gagnrýnt ríki NATO og sakað þau um að gera lítið sem ekkert fyrir Bandaríkin og dregið í efa að ríkin kæmu Bandaríkjunum til aðstoðar ef ráðist yrði á þau.

Ákvæði stofnsáttmála NATO um sameiginlegar varnir hefur einu sinni verið virkjað. Það var eftir árásirnar á Tvíburaturnana og varnarmálaráðuneyti Bandaríkjanna í september 2001. Þá gerðu Bandaríkjamenn innrás í Afganistan, þar sem leiðtogar al-Qaeda, sem gerðu árásirnar, héldu til.

Ríki NATO komu Bandaríkjunum til aðstoðar í Afganistan eftir árásina á Tvíburaturnanna og mörg þeirra ríkja fylgdu Bandaríkjunum einnig í innrásinni í Írak árið 2003. Þá komu mörg ríki NATO, auk annarra eins og Ástralíu, að þessum tveimur óvinsælu stríðum í gegnum árin og misstu fjölmarga hermenn.