Senda inn liðs­auka þar sem land­töku­menn sitja um heimili Palestínu­manna

Fjölskyldurnar tvær búa í útjaðri Qusra suður af borginni Nablus á Vesturbakkanum. Hópur ísraelskra landtökumanna gerði aðsúg að þeim á sunnudag og hefur setið um þær. Þær eru nú án rafmagns og vatns, að sögn breska ríkisútvarpsins BBC.

Þegar Ísraelsher mætti fyrst á staðinn sáust hermenn biðja bænir með landtökumönnunum. Herinn hefur sagt að þeir verði agaðir fyrir það.

Í nótt bárust svo fréttir af því að herinn hefði sent liðsauka á staðinn. Bækistöð landtökumanna er sögð hafa verið eyðilögð.

Annað húsanna er í eigu Bandaríkjamanns af palestínskum uppruna. Sá kvartaði til bandaríska sendiráðsins. Í kjölfarið krafðist Mike Huckabee, sendiherra Bandaríkjanna í Jerúsalem, þess að Ísraelar fjarlægðu landtökumennina sem hann lýsti sem „ísraelskum hryðjuverkamönnum“.

Ísraelskir landtökumenn hafa kerfisbundið hrakið Palestínumenn af landareignum sínum og lagt hald á þær. Landtökubyggðirnar stríða gegn alþjóðlegum sáttmálum en ísraelsk stjórnvöld hafa þrátt fyrir það stuðlað að útbreiðslu þeirra undanfarið.

Yfirlýst markmið landtökumannanna er að hreinsa hernumin svæði á Vesturbakkanum af Palestínumönnum.