Ljúka greiningu á við­veru í Evrópu fyrr en til stóð

Í skjali sem blaðamenn Reuters hafa komið höndum yfir verður meðal annars litið til þess hvernig innviðir í tilteknum ríkjum Evrópu geta nýst Bandaríkjunum hvað varðar aflbeitingargetu ríkisins.

Pete Hegseth, varnarmálaráðherra Bandaríkjanna, hefur boðið samdrátt í viðveru bandarískra hermanna í Evrópu en þeir eru um áttatíu þúsund talsins. Innan NATO eru áhyggjur um að Donald Trump, forseti Bandaríkjanna, vilji refsa ríkjum NATO fyrir að styðja Bandaríkin ekki nægjanlega í stríðinu gegn Íran.

Sjá einnig: Varaði Rússa við því að ráðast á NATO

Eftir að stríðið dróst á langinn byrjaði Trump að gagnrýna NATO-ríki fyrir að hafa ekki komið Bandaríkjunum til aðstoðar, á sama tíma hefur hann sagt að Bandaríkin þurfi enga hjálp frá Evrópu.

Í áðurnefndu skjali kemur fram að starfsmenn varnarmálaráðuneytisins munu meta hvort aðildarríki séu á trúverðugri vegferð varðandi að auka fjárútlát til varnarmála í takt við ákvarðanir leiðtoga NATO.

Sjá einnig: Kaninn pakkar saman í Evrópu

Bandaríkjamenn sendu nýverið spurningalista á ríkisstjórnir annarra aðildarríkja Atlantshafsbandalagsins, þar á meðal Íslands. Þar eru bandamenn Bandaríkjanna meðal annars spurðir út í það hvernig þeir hafi stutt við utanríkisstefnu Donalds Trump.

Spurningarnar eru liður í áætlunum Bandaríkjamanna um að draga úr viðbúnaði í Evrópu.

Spurningarnar snerust einnig um það hvernig aðgang bandarískir hermenn hefðu að innviðum í þessum tilteknu ríkjum. Í því samhengi hefur í gegnum árin verið talað um hugtak sem kallast ABO á ensku (access, basing and overflight rights) sem þýðist sem aðgengi hermanna, hýsingu þeirra og heimildir til að fljúga um lofthelgi ríkjanna.

Samkvæmt heimildarmanni Reuters hefur þetta hugtak nú verið útvíkkað til að ná einnig utan um annars konar stuðning sem bandamenn Bandaríkjanna geta veitt. Mun það nú einnig ná yfir aðgang að leynilegum upplýsingum á sviði leyniþjónusta og annars konar innviði sem gætu nýst Bandaríkjunum við aflbeitingargetu.

Matið á því hvar fækka eigi hermönnum mun taka mið af þessu útvíkkaða hugtaki.

Það á einnig að byggja á fundi Elbridge Colby, stefnumálastjóra varnarmálaráðuneytis Bandaríkjanna, með sendiherrum NATO í Belgíu í dag.