Túlkunar­at­riði hvað eigi að gera við um­sóknina

„Við urðum vitni að því að menn eru búnir að vera í hitagír í allt sumar meira og minna. Ég held að það taki smá tíma að kólna í kolunum. Þó að það sé búið að grilla þá kólna kolin ekki alveg strax,“ segir Birgir Guðmundsson, prófessor í fjölmiðla- og stjórnmálafræði við Háskólann á Akureyri. Sum kolin séu þó heitari en önnur og þurfi lengri tíma til að kólna.

Birgir segir niðurstöðu atkvæðagreiðslunnar hafa verið nokkuð afgerandi miðað við í hvað stefndi. Þó hafi staðan verið nokkuð jöfn og mögulega hefði verið heppilegra hefði farið 60 prósent á móti 40 prósentum. Þá hefðu menn getað talað um afgerandi niðurstöður.

Birgir Guðmundsson var til viðtals í Reykjavík Síðdegis á Bylgjunni í dag.

Hann telur að eftirmálar þjóðaratkvæðagreiðslunnar muni lita þingstörf vetrarins, sér í lagi ef ríkisstjórnin dregur ekki umsókn Íslands að Evrópusambandinu formlega til baka. 

Fram hefur komið að stjórnarandstaðan ætlar að leggja fram þingsályktunartillögu um að draga umsókn Íslands í Evrópusambandið formlega til baka geri ríkisstjórnin það ekki sjálfviljug. Stjórnarandstaðan muni ganga fast á eftir því að því verði fylgt eftir. 

Óljóst hvað eigi að „ganga langt“

Aftur á móti séu margir á því máli að óþarfi sé að loka dyrunum fyrir Evrópusambandið alveg vegna þess að nei-ið hafi ekki unnið með meira afgerandi hætti en raun ber vitni.

„Það verður alveg örugglega einhver hasar í kringum þetta í þinginu,“ segir hann. 

Birgir segir það túlkunaratriði hverjir nákvæmlega eftirmálar þjóðaratkvæðagreiðslunnar eigi að vera.

„Í sjálfu sér var kosið um hvort ætti að halda áfram viðræðum. Þannig að það er túlkunaratriði hvað á að ganga langt, hvort það eigi að hérna draga umsóknina til baka, fyrst hún var í gildi, eða ekki.“

Sjá einnig: „Það væru frá­leit við­brögð við þessari niður­stöðu“

Fjörugur þingvetur í vændum 

Kristrún Frostadóttir forsætisráðherra sagði að ríkisstjórnin myndi leggja áherslu á EES-samninginn á komandi haustþingi. Birgir segir átakalínuna í þinginu færast frá umræðum um aðild að Evrópusambandinu og yfir í hversu langt Ísland eigi að ganga innan EES.

„Menn vilja styrkja og tryggja það að EES-samningurinn verði áfram í gildi, að það verði engar svoleiðis misfellur í því og að við virðum hann meira heldur en við höfum gert. “

Ríkisstjórnin fari inn í þennan þingvetur með „tapið“ á bakinu þó formenn stjórnarflokkanna hafi snúið niðurstöðum þjóðaratkvæðagreiðslunnar í „hálfgerðan sigur“. Birgir býst við fjörugum þingvetri sama hvort Evrópumálin verði í brennidepli eða ekki. 

„Ef Evrópumálin fara út af dagskránni núna þá koma bara hin betur fram. Það eru efnahagsmálin og kjaramálin. Við erum ekki laus við kjarasamninga, verðbólgu, atvinnuleysi, háa vexti og allt þetta. Menn hljóta að fara að snúa sér að því.“