Ís­lensk ung­menni drekka minnst af orku­drykkjum

Þetta kemur fram í niðurstöðum samnorrænnar rannsóknar sænsku matvælastofnunarinnar. Rétt er að taka fram að svarendur á Íslandi voru umtalsvert færri á Íslandi en í hinum löndunum og skekkjumörkin því mun hærri. 

Fjögur prósent íslenskra ungmenna drekka tvo orkudrykki á dag eða fleiri. Hæst er hlutfallið í Svíþjóð, átta prósent. Fimmtán prósent segjast drekka orkudrykk daglega, hlutfallið aftur hæst í Svíþjóð í tuttugu prósentum. Þrettán prósent drekka orkudrykk þrisvar til sex sinnum í viku, fjórtán prósent einu sinni til tvisvar í viku og átta prósent einu sinni til þrisvar í mánuði. 

Hlutfall þeirra sem aldrei drekka orkudrykk á Íslandi er 36 prósent og er hæst allra Norðurlanda. Í Danmörku er það 29 prósent, Noregi tuttugu prósent, tólf prósent í Finnlandi og einungis sjö prósent sænskra ungmenna segjast aldrei drekka orkudrykki. 

Flest þeirra íslensku ungmenna sem tóku þátt í rannsókninni sögðust hafa fyrst drukkið orkudrykk á aldrinum fjórtán til fimmtán ára, 58 prósent. 

Flestir sögðust drekka orkudrykki fyrir bragðið og til að vera orkumeiri. Þeir sem aldrei drekka orkudrykki sögðust flestir bara ekki hafa áhuga á því, 76 prósent. Þeir sem drekka þá gera það oftast í skólanum eða vinnunni, 58 prósent. 31 prósent gera það heima og 22 prósent þegar þau eru úti með vinum sínum. 

Einungis níu prósent sögðust eiga erfitt með að komast í gegnum daginn án orkudrykkja og er hlutfallið hærra á hinum Norðurlöndunum.