Nýjasta spjaldtölva Google, Nexus 7, er uppseld víðast hvar í Bandaríkjunum. Tölvan var opinberuð á I/O tækniráðstefnunni í síðasta mánuði en hún er knúin af nýrri útgáfu Android stýrikerfisins, Jelly Bean.
Nexus 7, sem framleidd er af tæknifyrirtækinu Asus, var tekin til sölu vestanhafs fyrir nokkrum dögum. Nú þegar er spjaldtölvan uppseld í mörgum búðum.
Spjaldtölvan nýtur mikillar hylli meðal sérfræðinga. Þannig lofa margir hönnun hennar og tækjabúnaði. Þá kostar Nexus 7 aðeins 30 þúsund krónur og er þannig margfalt ódýrari en iPad spjaldtölvan frá Apple.
Með tölvunni vill Google losa um tök Apple á spjaldtölvumarkaðinum. Talið er að Apple muni svara þessari innreið Google inn á markaðinn með því að bjóða upp á minni og ódýrari útgáfu af iPad spjaldtölvunni.
Þannig er sótt að Apple úr báðum áttum. Spjaldtölva Amazon, Kindle Fire, hefur sótt hart að iPad og nú þegar Nexus 7 er komin á markað þá neyðist Apple til að endurskoða sín mál, ætli fyrirtækið sér að halda í ráðandi markaðshlutdeild sína.
Nexus 7 fær glimrandi viðtökur
