Drápu hátt­settan leið­toga Hesbollah

Samkvæmt AP fréttaveitunni varð jeppi Tawill fyrir sprengju í þorpinu Kherbet Selem nærri landamærum Líbanon og Ísrael.

Auknar áhyggjur eru af allsherjar átökum milli Ísrael og Hesbollah. Árásum yfir landamæri Ísrael og Líbanon, þar sem Hesbollah samtökin eru gífurlega áhrifamikil, hefur farið fjölgandi að undanförnu. Um helgina gerðu vígamenn Hesbollah umfangsmikla árás á herstöð í norðanverðu Ísrael og er mögulegt að árásin í morgun hafi verið svar við henni.

Þá hafa Ísraelar fjölgað árásum sínum á Hesbollah í Sýrlandi en þær eru sagðar beinast að vopnasendingum frá Íran til Líbanon.

Ísraelar hafa gert árásir gegn Hesbollah og Íran í Sýrlandi um árabil en heimildarmenn Reuters segja aukinn kraft hafa færst í þær á undanförnum vikum. Heimildarmennirnir segja einnig að Ísraelar virðist hættir að reyna að forða mikið mannfall meðal vígamanna Hesbollah.

„Þeir skutu áður viðvörunarskotum. Þeir skutu nærri vörubílum okkar, svo strákarnir stukku úr þeim og svo hittu þeir vörubílana,“ sagði einn heimildarmaður Reuters. „Nú hefur því verið hætt. Ísrael gerir banvænni og tíðari loftárásir á íranskar vopnasendingar og loftvarnarkerfi í Sýrlandi.“

Annar heimildarmaður fréttaveitunnar, úr röðum starfsmanna leyniþjónusta í Sýrlandi, sagði Ísraela gera árásir á varnarbúnað eins og loftvarnarkerfi, áður en hermenn setja hann upp. Þá væru flugvellirnir í Damascus og Aleppo, sem Íranar hafa notað til að senda vopn til Hesbollah, nánast óstarfhæfir vegna tíðra árása.

Hann sagði Ísraela vera að senda skilaboð til Bashar al-Assad, forseta Sýrlands. Hann hafi leyft Íran og Hesbollah að flytja vopn um landið og koma sér þar fyrir. Nú væri það að koma niður á honum.

Stríð í Líbanon mögulega óhjákvæmilegt

Ísraelar lýstu því nýverið yfir að hernaði þeirra á norðurhluta Gasastrandarinnar væri að mestu lokið. Nú væri einblínt á miðhluta Gasa og borgina Khan Younis í suðurhlutanum. Embættismenn segja að átökin muni líklega standa yfir í nokkra mánuði til viðbótar, þar sem Ísraelar hafa einsett sér að brjóta Hamas-samtökin á bak aftur.

Hernaðurinn hefur kostað minnst 23 þúsund Palestínumenn lífið, þar af lang flesta óbreytta borgara og fjölmörg börn. Mikill meirihluti 2,3 milljóna íbúa Gasastrandarinnar hafa þurft að flýja heimili sín og stór hluti þeirra stendur frammi fyrir hungursneyð.

Ráðamenn í Ísrael hafa gefið í skyn að breyta þurfi stöðunni í Líbanon, fylgi Hesbollah ekki samkomulagi Sameinuðu þjóðanna frá 2006 og vígamenn samtakanna hörfi ekki frá landamærunum og er óttast að stríð gæti hafist milli Ísrael og Hesbollah. Stjórnendur samtakanna eru í erfiðri stöðu, samkvæmt AP fréttaveitunni.

Þeir geta ekki sætt sig við árásir Ísraela án þess að líta út fyrir að vera í veikri stöðu eða virðast óáreiðanlegir bandamenn. Hefjist stríð, hafa ráðamenn í Ísrael heitið umfangsmiklum árásum á Líbanon, þar sem íbúar hafa þegar þurft að glíma við umfangsmikil efnahagsvandræði og spillingu um árabil.

AP segir að stuðningsmenn Hesbollah í Líbanon hafi áhyggjur af því að stríð við Ísrael myndi reynast of kostnaðarsamt.

Einn viðmælandi fréttaveitunnar, sem starfar hjá ísraelskri hugveitu um varnarmál, segir hvorki Ísraela né leiðtoga Hesbollah vilja stríð. Báðar fylkingar telji stríð þó óhjákvæmilegt. Í Ísrael telji fólk það tímaspursmál hvenær grípa þurfti til aðgerða svo þeir tugir þúsunda sem hafa flúið heimili sín í norðanverðu Ísrael geti snúið aftur.

Íran ekki lengur einangrað

Íran styður bæði Hamas og Hesbollah, auk þess sem klerkastjórn landsins stendur við bak Húta í Jemen og vopnaðra sveita í Írak. Hútar hafa gert fjölmargar árásir á fraktskip á Rauðahafi, þar sem stór hluti skipaflutninga fer um á leið í og úr Súesskurðinum, og umræddar sveitir í Írak hafa gert tugi árása á bandaríska hermenn þar.

Yfirvöld í Bandaríkjunum hafa hótað loftárásum, hætti árásirnar á skipin og sveitir Bandaríkjanna ekki.

Sjá einnig: For­dæma Banda­ríkja­menn vegna drónaárásar í Baghdad

Í frétt New York Times kemur einnig fram að Íranar hafi sett aukinn kraft í auðgun úrans. Alþjóðlegir eftirlitsaðilar lýstu því yfir í desember að Íran hefði aukið auðgun Úrans mjög og er talið að klerkastjórnin sitji á nægilegu magni af úrani í þrjár kjarnorkusprengjur. Einungis þurfi nokkrar vikur til að gera úranið klárt í vopnaframleiðslu.

Í grein NYT segir að klerkastjórnin sé ekki lengur einangruð, heldur njóti hún stuðnings yfirvalda í Rússlandi og í Kína en bæði ríkin eigi í viðskiptum við Íran sem fari gegn samþykktum öryggisráðs Sameinuðu þjóðanna, sem Rússland og Kína eiga varanlegt sæti í.