Óskar eftir því að dómur Hæsta­réttar verði ræddur í nefnd

Í dómi Hæstaréttar komst dómstóllinn að því að kynferðisbrot þar sem gerandi og þolandi eru fjarri hvoru öðru og brotin fara fram í gegnum samfélagsmiðla eða samskiptaforrit teljast ekki til nauðgunar. Hæstiréttur var að þessu leyti ósammála Landsrétti. Þrátt fyrir það staðfesti Hæstiréttur refsingu Landsréttar þar sem hann var dæmdur til sjö ára fangelsivistar.

Dómur Hæstaréttar hefur vakið þónokkra athygli og þá helst kannski þar sem segir að sú þróun sem hafi orðið með „aukinni netnotkun barna og breyttu samskiptamynstri þeirra í milli og við aðra með notkun samskiptaforrita og samfélagsmiðla gerir þau berskjölduð gagnvart kynferðislegri háttsemi sem unnt er að drýgja á þessum vettvangi.“

Þá segir einnig í dómi að þrátt fyrir þessa þróun og ótvíræða skyldu löggjafans til að vernda börn gegn hvers konar misnotkun, þar á meðal kynferðislegri, sé ekki hægt að ráða það í orðalag ákvæða almennra hegningarlaga, sem fjalla um slík brot, að orðalag þeirra endurspegli þróunina og nái þannig þeirrar háttsemi að fjarstaddur gerandi fái annan mann, í tilviki brotaþola, barn, til þess að fróa sjálfu sér eða eiga kynferðismök við aðra og fái síðar myndskeið sent af því.

Eyjólfur segir þetta að mörgu leyti áhugaverðan dóm og vill að nefndin ræði þetta frekar. Hann segir að hann hafi fengið jákvæðar undirtektir hjá nefndarmönnum fyrir umræðunni.

„Ég lagði til að hann yrði eftir næstu viku og að að það komi sérfræðingar ráðuneytisins á fundinn,“ segir Eyjólfur.

Hann segir það á ábyrgð dómsmálaráðherra, Guðrúnar Hafsteinsdóttur, að vísa því til refsiréttarnefndar ef skoða eigi þau ákvæði hegningarlaga við eigi við og það verði að koma í ljós hvort hún muni óska eftir því.

„Þetta er gríðarlega mikilvægt réttarsvið og snýr að börnum og það er mikilvægt að bregðast við þessu. Ég tel að það þurfi mögulega að skoða fleiri ákvæði,“ segir Eyjólfur.