Tuttugu og fimm prósenta tollur á innflutta bíla tók gildi í apríl en næstkomandi laugardag mun þessi tollur einnig ná yfir innflutta bílaíhluti.
Tollarnir eiga að vera áfram til staðar en samkvæmt frétt Wall Street Journal ætlar Trump að ganga úr skugga um að bílaframleiðendur fá undanþágu gagnvart öðrum tollum eins og tollum á stál og ál.
Þar að auki eigi bílaframleiðendur að fá endurgreiðslur vegna tolla á bílaíhluti. Þær greiðslur eiga að vera allt að 3,75 prósent af virði bíls í eitt ár. Hlutfallið fellur svo í 2,5 prósent í ár til viðbótar.
Bílaiðnaður Bandaríkjanna er mjög samofinn iðnaði Kanada og Mexíkó. Hver bíll sem framleiddur er í Bandaríkjunum er settur saman úr íhlutum sem margir eru framleiddir í Mexíkó og Kanada og má segja að hver bíll fari margsinnis yfir landamærin áður en hann endar á bílasölu vestanhafs.
Búist er við að Trump muni opinbera þessar ætlanir sínar í dag, fyrir ferð til Detroit í kvöld.
Vonast er til þess að bílaframleiðendur geti notað þennan tíma til að endurskipuleggja aðfangakeðjur sínar og færa framleiðslu bíla og íhluta til Bandaríkjanna.
Forsvarsmenn stærstu bílafyrirtækja Bandaríkjanna hafa lýst yfir ánægju með þessar ætlanir.
Verðhækkanir í vændum
Greinendur búast fastlega við því að bílaverð muni hækka töluvert í Bandaríkjunum. Starfsmenn Morgan Stanley hafa til að mynda sagt að meðalverð bíls gæti hækkað um sex þúsund dali, sem samsvarar um tíu til tólf prósenta hækkun.
New York Times segir að þessar hækkanir muni eiga við bæði nýja og gamla bíla. Viðgerðarkostnaður muni einnig aukast og tryggingargjöld hækka.
Trump hefur beitt fjölmörgum og umfangsmiklum tollum frá því hann tók við embætti forseta í janúar. Í mörgum tilfellum hefur hann í kjölfarið breytt um stefnu, lækkað tolla, seinkað þeim eða fellt niður og hafa tollarnir og vendingarnar kringum þá leitt til mikillar óreiðu á mörkuðum um heiminn allan.
Sjá einnig: Gefur eftir í tollastríði við Kína
Skoðanakannanir sem framkvæmdar hafa verið vestanhafs undanfarna daga, í tilefni af hundrað daga embættistíð Trumps, sýna að kjósendur eru flestir ósáttir við framgöngu forsetans.
Fleiri segja hann hafa staðið sig illa í embætti en segja hann hafa staðið sig vel. Þá hafa kjósendur sérstaklega áhyggjur af því að Trump hafi tekið sér of mikil völd og meiri völd en stjórnarskrá Bandaríkjanna veiti honum.
Í nýlegri könnun NYT sögðust 55 prósent kjósenda ósáttir við tolla Trumps en þegar kom að svokölluðum óháðum kjósendum var hlutfallið 65 prósent.
