Þjóð­verjar völtuðu yfir Dani í seinni hálf­leik

Þýskaland tryggði sér sæti í átta liða úrslitum Evrópumóts kvenna í fótbolta í Sviss með sigri á Dönum. Danir eru án stiga í riðlinum og sitja því eftir með sárt ennið.

Þjóðverjar höfðu talsverða yfirburði í leiknum en gekk illa að koma boltanum í netið. Á 21. mínútu var mark dæmt af Þjóðverjum eftir vandlega yfirlegu í VAR og greiningu á hljóði sem kemur þegar boltinn er snertur en skotið fór af leikmanni í rangstöðu og því dæmt af.

Danir komust svo yfir, nokkuð gegn gangi leiksins með marki frá Amalie Vangsgaard skömmu síðar. Þjóðverjar vildu fá vítaspyrnu rétt fyrir hálfleik en VAR sagði nei. VAR sagði aftur á móti já á 54. mínútu, Sjoeke Nüsken fór á punktinn og skoraði af öryggi. 

Danir komust varla í sókn í seinni hálfleik og á 66. mínútu reyndu þeir örvæntingarfulla hreinsun sem fór í höfuðið á þeirra eigin leikmanni og beint inn í teig þar sem Lea Schüller nýtti sénsinn og skoraði. Það reyndist sigurmarkið og Þýskaland er þar með búið að tryggja sig áfram í 8-liða úrslit en Danir eru án stiga.

Pólland og Svíþjóð mætast svo klukkan 19:00 í seinni leik dagsins í riðlinum en með sigri geta Svíar einfaldlega lokað riðlinum fyrir bæði Danmörk og Pólland.