Sevilla hefur áhuga á Greenwood

Runólfur Trausti Þórhallsson skrifar 16. október 2023 20:00

Mason Greenwood virðist líka lífið vel á Spáni. Alvaro Medranda/Getty Images

Talið er að enski framherjinn Mason Greenwood vilja skipt alfarið yfir til Getafe þar sem hann er á láni frá Manchester United. Talið er að Sevilla ætli að veita Getafe samkeppni um leikmanninn sem spilaði hvorki né æfði í fleiri mánuði eftir að þáverandi kærasta hans sagði hann hafa beitt sig ítrekuðu líkamlegu ofbeldi og birti myndir því til sönnunar.

Hinn 22 ára gamli Greenwood hefur komið sögu í fimm leikjum hjá Getafe í spænsku úrvalsdeildinni, La Liga. Hann hefur skorað eitt mark, gefið eina stoðsendingu og nælt sér í eitt gult spjald.

Hann er á mála hjá félaginu eftir að Man United ákvað að senda leikmanninn á láni eftir að félagið hafið lokið eigin rannsókn á máli hans er varðaði ofbeldi gegn þáverandi kærustu.

Kærastan birti myndir sem sýndu áverka sem hún sagði að Greenwood hefði veitt henni. Þá birti hún hljóðbrot af því þegar það mátti heyra Greenwood þvinga hana til samræðis.

Hann var ákærður af lögreglunni í Manchester en á endanum var málið látið falla niður þar sem lykilvitni breyttu vitnisburði sínum og ekki var talið að sakfelling myndi nást í málinu.

Man United hélt í kjölfarið eigin rannsókn og virtist sem félagið væri við það að gefa Greenwood grænt ljós á að æfa og spila með liðinu. Allt kom þó fyrir ekki og var hann sendur á láni til Getafe. Nú hefur The Mirror greint frá því að Greenwood líði vel á Spáni og sé tilbúinn að skipta alfarið yfir til Getafe.

Það er þó ljóst að félagið mun þurfa kaupa leikmanninn þar sem hann er samningsbundinn Man United til 2025 og þá hefur Sevilla einnig áhuga á að fá Greenwood í sínar raðir.

Getafe er í 11. sæti La Liga með 10 stig á meðan Sevilla er í 14. sæti með 8 stig.

Fótbolti Enski boltinn Spænski boltinn Mál Mason Greenwood

Mest lesið

Fleiri fréttir