Sá fimmti fer fyrir dómara í kvöld

Í tilkynningu Lögreglunnar á Suðurlandi síðdegis í dag kemur fram að nú séu tveir karlmenn og tvær konur í haldi. Í kvöld verði fimmti aðilinn, karlmaður sem var handtekinn í gær, leiddur fyrir dómara þar sem tekin verður fyrir gæsluvarðhaldskrafa frá lögreglunni.

Í tilkynningu kemur einnig fram að Landsréttur staðfesti fyrr í dag gæsluvarðhaldsúrskurð Héraðsdóms Suðurlands frá því á miðvikudag yfir þeim tveim aðilum sem kærðu úrskurðina til Landsréttar.

„Rannsókn málsins miðar vel og heldur áfram af fullum þunga. Vegna rannsóknarhagsmuna er ekki unnt að veita nánari upplýsingar í málinu að svo stöddu,“ segir að lokum.

Fannst þungt haldinn á göngustíg

Málið varðar rannsókn á andláti karlmanns á sjötugsaldri sem fannst þungt haldinn á göngustíg í Gufunesi snemma á þriðjudagsmorgun og lést stuttu eftir komu á spítala.

Lögregla hóf leit að manninum kvöldið áður eftir tilkynningu um að hann hefði horfið af heimili sínu og óttast væri um hann. Samkvæmt tilkynningu frá lögreglu kviknaði fljótlega grunur að um frelsissviptingu væri að ræða.

Alls hafa tíu verið handteknir við rannsókn málsins. Fimm hefur verið sleppt úr haldi eftir yfirheyrslur.

Í tilkynningu lögreglunnar fá því í gær kom fram að lögregla hefði frá því rannsókn hófst lagt hald á nokkrar bifreiðar, farið í húsleitir og yfirheyrt fjölda vitna.

Fréttin hefur verið uppfærð eftir að tilkynning lögreglu var birt.