Ís­land verður ekki með í Euro­vision

Fulltrúar evrópskra sjónvarpsstöðva samþykktu í síðustu viku að leyfa Ísraelum að taka þátt í Eurovision í Vín í Austurríki á næsta ári. Nokkur lönd tilkynntu þá þegar að þau myndu draga sig úr keppninni. Þeirra á meðal voru Hollendingar, Spánverjar, Írar og Slóvenar. Stjórnarformaður Ríkisútvarpsins hefur áður sagt ákvörðun um þátttöku Íslands verða tekna í dag en lokafrestur til að tilkynna EBU um þátttöku rennur út í dag.

Frétt uppfærð 16:35:

Horfa má á tilkynningu þeirra Stefáns Eiríkssonar útvarpsstjóra og Stefáns Jóns Hafsteins stjórnarformanns Ríkisútvarpsins hér beint fyrir neðan.

Muni ekki ríkja friður og gleði

Í tilkynningu frá Ríkisútvarpinu segir að ákveðið hafi verið að taka ekki þátt í keppninni sem fer fram í Vínarborg í Austurríki á næsta ári. Þáttaka ísraelska ríkissjónvarpsins KAN hafi að undanfarið valdið óeiningu, bæði meðal aðildarstöðva Sambands evrópskra útvarpsstöðva og almennings.

Þar er þess getið að þátttaka KAN hafi verið tekin til ítarlegrar umræðu á fundum EBU fyrr á þessu ári, fyrst í London og svo í Genf. Á fundinum í Genf hafi mikill  mikill meirihluti aðildarstöðva EBU samþykkt að ýmsar breytingar sem gerðar hafa verið á reglum og framkvæmd keppninnar væru fullnægjandi og því kom ekki til atkvæðagreiðslu um þátttöku KAN í keppninni.

„Útvarpsstjóri gerði grein fyrir því á fundinum í Genf að þrátt fyrir að breytingarnar kæmu til móts við margar af þeim athugasemdum sem fulltrúar RÚV hefðu gert á ýmsum stigum EBU-samstarfsins síðustu ár væru enn efasemdir að mati RÚV um að þær dygðu til,“ segir í tilkynningunni.

Ítrekað hafi komið farm að hagsmunaaðilar hér á landi, til dæmis samtök listamanna og íslenskur almenningur væri andvígur þáttöku. Þá hefði stjórn RÚV óskað eftir því við EBU að KAN yrði vikið úr keppninni með hliðsjón af fordæmum. Málið væri flókið úrlausnar og hefði nú þegar skaðað orðspor keppninnar og EBU. Mikilvægt væri að finna lausn fyrir alla hlutaðeigandi.

„Ljóst er miðað við opinbera umræðu hér á landi og viðbrögð við ákvörðun EBU sem tekin var í síðustu viku að hvorki mun ríkja gleði né friður um þátttöku RÚV í Eurovision. Það er því niðurstaða RÚV að tilkynna EBU um það í dag að RÚV taki ekki þátt í Eurovision á næsta ári.“

Ekkert liggi fyrir um söngvakeppni

„Söngvakeppnin og Eurovision hafa ávallt haft það markmið að sameina íslensku þjóðina en nú er ljóst að því markmiði verður ekki náð og á þeim dagskrárlegu forsendum er þessi ákvörðun tekin.

Ekki liggur fyrir ákvörðun um hvort haldin verður söngvakeppni á vegum RÚV á næsta ári. Verið er að meta fyrirliggjandi kosti í stöðunni og verður ákvörðun um það kynnt þegar hún liggur fyrir.“

Fréttin hefur verið uppfærð.