Sam Hewson, miðjumaður FH, leikur ekki með liðinu næstu átta vikurnar vegna fótbrots. Þetta staðfesti Heimir Guðjónsson, þjálfari FH, í samtali við Fótbolta.net í dag.
Hewson lék sjö fyrstu leiki FH í Pepsi-deildinni en hann meiddist í leiknum gegn Víkingi í 7. umferð og hefur ekki spilað síðan þá.
Hewson kom til FH frá Fram fyrir síðasta tímabil og hefur síðan þá leikið 29 leiki fyrir Fimleikafélagið í deild og bikar.
FH-ingar geta þó huggað sig við það að bakvörðurinn Jonathan Hendrickx er byrjaður að æfa á ný eftir meiðslin sem hann varð fyrir í leiknum gegn KR í 1. umferðinni.
FH er með eins stigs forskot á Breiðablik á toppi Pepsi-deildarinnar þegar níu umferðir eru búnar af mótinu.
