Upp­gjörið: FH - Breiða­blik 2-0 | Kraft­miklir Hafn­firðingar kafsigldu Blika

Áttundu umferð Bestu deildar karla lauk í kvöld með leik FH og Breiðabliks í Kaplakrika. Fyrir leikinn var Breiðablik í þriðja sæti deildarinnar en FH í 11. og næstsíðasta sætinu.

Flestir höfðu því fyrirfram búist við öruggum sigri Breiðabliks en svo varð ekki. Fyrri hálfleikur var heldur tíðindalítill þar sem Blikar héldu boltanum en FH voru beittir í sínum sóknum. Það sást svo best á lokamínútu fyrri hálfleiksins þegar FH þarf einungis þrjár sendingar frá markverði til að skora mark. Kjartan Kári fékk þá boltann á vinstri kantinum og sendi hann fyrir þar sem Björn Daníel var einn og óvaldaður í teignum og skoraði í tómt markið. Vörn Blika leit ekki vel út þar en 1-0 forysta heimamanna var staðreynd.

Sama var uppá teningnum við upphaf seinni hálfleiksins. Breiðablik fékk að dútla með boltann en sköpuðu sér ofsalega lítið. Á sama tíma voru skyndisóknir FH-inga hættulegar. Niðurstaðan varð því aftur sú að FH skoraði mark og aftur var það eftir fyrirgjöf Kjartans Kára. Fyrirgjöfin sveif í gegnum vörn Breiðabliks, beint í fæturnar á Sigurði Bjarti sem kláraði stutt færi vel. Heimamenn komnir nokkuð óvænt tveimur mörkum yfir og það verðskuldað. Fleiri mörk voru ekki skoruð og niðurstaðan sanngjarn 2-0 sigur heimamanna.

FH hefur þar með unnið þrjá af síðustu fjórum leikjum sínum eftir erfiða byrjun á tímabilinu. Þeir stökkva þar með upp í 7. sæti deildarinnar. Breiðablik aftur á móti hafði ekki tapað í fimm leikjum í röð fyrir þennan en fá alvöru skell og mistekst þar með að stökkva í efsta sæti deildarinnar.

Atvik leiksins

Fyrsta markið kom rétt fyrir hálfleikinn og breytti hálfleiksræðum beggja liða gríðarlega. Markið sem var mjög einfalt að hálfu FH og fanta vel gert var líka klaufalega varist hjá Breiðablik. Þetta breytti leiknum algjörlega og setti hann á hvolf. Pressan jókst á Breiðablik en FH fékk trú á frammistöðu sína.

Stjörnur og skúrkar

Stjörnur leiksins eru nokkrar. Björn Daníel skorar auðvitað gott mark og sýnir enn og aftur hversu góður skallamaður hann er. Kjartan Kári var mjög hættulegur í hvert skipti sem hann sá boltann og endar með tvær stoðsendingar. Sigurður Bjartur var einnig lúsiðinn, barðist eins og ljón sem skilaði marki í dag.

Skúrkar var öll vörn Blika sem leit mjög illa út í báðum mörkum FH. Í bæði skiptin kemst fyrirgjöf Kjartans Kára auðveldlega í gegnum miðverðina og Anton í markinu lítur líka illa út. Engin varnarmaður tekur ábyrgð á bolta eða manni og niðurstaðan þessu. Blikum vantar Damir!

Dómararnir

Jóhann Ingi og hann teymi stóðu sig vel að vanda. Flest stóru atvikin voru rétt, eina sem má skoða betur er vítið sem FH vildi fá í fyrri hálfleik. Höfðu góða stjórn á leiknum og ekkert uppá þá að klaga í dag.

Stemningin og umgjörð

Frábær mæting í Kaplakrika í kvöld og góð stemmning. Það var dálítið kalt sunnudagskvöld sem bauð upp á þennan fína fótboltaleik og því frábært að fá jafn góða mætingu. FH-ingar með allt uppá tíu að vanda þegar kemur að umgjörð.

Viðtöl

Böðvar: „Evrópa er markmiðið“

Böðvar Böðvarsson leikmaður FH var í skýjunum eftir sigur liðsins á Breiðablik í kvöld. FH var kraftmikið og vann að lokum 2-0 sigur.

„Ótrúlega sætt. Við vissum að við ættum að vinna öll lið á okkar heimavelli. Það var farið að fara í taugarnar á okkur að þetta væri alltaf skemmtilegasti völlurinn, það var kominn tími á að við myndum vinna hérna líka.“ -Sagði Böðvar um leikinn og bætti við um hvað skóp þeirra sigur.

„Mér fannst við bara koma í veg fyrir þeirra spil. Þeir eru mjög góðir í því að yfirmanna kantana en mér fannst við mæta því vel í dag. Miðjumennirnir okkar hlaupa 13 kílómetra í hverjum leik, þá verður varnarleikurinn alltaf helvíti léttur þegar þú ert með þessa menn fyrir framan þig.“

Böðvar bjargaði á marklínu um miðbik seinni hálfleiks og kom í veg fyrir mark Blika. Hann viðurkenndi að hafa ekki verið alveg öruggur.

„Þetta hefði getað farið í allar áttir, ég tók hann með hægri. Bara guðs lifandi feginn að hann fór út.“ - Sagði Böðvar og bætti við um stöðuna á FH liðinu.

„Það geta allir unnið alla í þessari deild. Þetta snýst bara um hversu mikið „momentum“ þú færð með þér. Við vitum að við getum unnið alla en vitum líka að þegar við erum að spila illa erum við jafnversta lið deildarinnar. Þurfum að ná svona frammistöðu í hverjum einasta leik ef við ætlum að gera þetta. Markmiðið er það sama og fyrir tímabilið þrátt fyrir erfiða byrjun. Það er ekki langt í Evrópusætið og það er markmiðið.“

FH stökk upp í 7. sæti deildarinnar úr fallsæti, er liðið búið að finna taktinn? 

„Mér finnst það en það má lítið fara úrskeiðis til þess að við náum ekki úrslitum. þetta þarf að vera svona alltaf.“ - Sagði Böðvar að lokum og fór að fagna með liðsfélögum sínum.

Kjartan Henry: „FH stefnir alltaf á toppinn“

Kjartan Henry Finnbogason aðstoðarþjálfari FH ræddi við Gunnlaug Jónsson hjá Stöð 2 stuttu eftir leik og var kampakátur.

„Hrikalega ánægður. Sterk frammistaða. Sáum stemmningu í hópnum fyrir þennan leik og það skilaði sér í leikinn.“ - Sagði Kjartan og bætti við um hvað þarf til til að sigra íslandsmeistara Breiðabliks.

„Fyrst og fremst að byrja á grunnatriðunum, tókum auðvitað helling af atriðum með okkur úr leiknum á mánudaginn. Það er engin töfraformúla, það er að vinna sína menn og vera þéttir. Þeir eru auðvitað með frábært lið og við sáum það á skiptinunum í dag. Fannst við gera vel að loka á þá.“

FH stökk upp um fimm sæti með sigrinum í dag og virðast vera að finna rétta holningu á liðinu og Kjartan tók undir það. 

„Hún hefur verið þarna. Höfum farið yfir það að á meðan við erum ekki að gefa frá okkur mörk þá eru okkur allir vegir færir. Erum að spila þriðja heimaleikinn í kvöld og erum ósigraðir. Ætlum að halda í það og fá áhorfendur með okkur.“

Böðvar Böðvarsson fyrirliði FH sagði í viðtali eftir leik að FH stefndi á Evrópusæti. Það virtist ekki koma Kjartani mikið á óvart að Böðvar hefði talað af sér. „Gerði hann það já? Að sjálfsögðu stefnir FH alltaf á toppinn. Ætlum að halda áfram að byggja á því sem við erum að gera vel og sjáum hvert það leiðir okkur.“ - Sagði Kjartan að lokum