Blikar nær sæti í Landsbankadeild

Breiðablik færðist nær sæti í Landsbankadeild karla í knattspyrnu í gær þegar liðið sigraði Þór með einu marki gegn engu. Kristján Óli Sigurðsson skoraði markið en tveimur leikmönnum Þórs var vísað útaf 10 mínútum fyrir leikslok. KA sigraði Víking Ólafsvík 1-0 með marki Jóhanns Þórhallssonar. Völsungur vann HK 2-0. Birkir Vagn Ómarsson og Arngrímur Arnarson skoruðu mörkin. Einn efnilegasti knattspyrnumaður landsins, Rúrik Gíslason í HK meiddist illa undir lokin. Þegar fimm umferðir eru eftir hefur Breiðablik 35 stig, Víkingur 28 og KA 24 í þriðja sæti. Þessi þrjú lið hafa mikla yfirburði en Haukar, HK og Víkingur Ólafsvík eru í 4.-6. sæti með 15 stig. Völsungur, Fjölnir og Þór eru með 12 stig og KS er núna í neðsta sætinu með 11 stig.